Mieres va contar con una de les redes de calefacción por distritu más potentes d’Europa
Saul Villarin - Les obres que s’están faciendo en distintes cais del cascu urbanu supondrán una inversión de 3,4 millones d’euros y van permitir que esta infraestructura llegue a 20 edificios públicos del conceyu.
- Con esta obra va tar lista la instalación pa aprovechar enerxía llímpia, impulsando l’aforru y la eficiencia enerxética y avanzando na sostenibilidá.
MIERES, 17 DE SETIEMBRE DE 2025.– Impulsar l’aforru y la eficiencia enerxética y avanzar na sostenibilidá. Esos son los oxetivos de les obres que se tán faciendo en distintes cais del cascu urbanu de Mieres pa prolongar la rede de calefacción por distritu.
Una actuación que, con una inversión de 3,4 millones d’euros, va permitir instalar la infraestructura necesaria pa la distribución d’enerxía llímpia a una ventena d’edificios públicos del conceyu y va facer que Mieres tenga una de les redes más importantes y potentes de calefacción por distritu d’Europa.
Trátase d’un sistema centralizáu que suministra calor al traviés d’una rede de tuberíes aprovechando fuentes d’enerxía renovables y eficientes.
Agora mesmo los trabayos céntrense en poner en marcha esti sistema de distribución, con instalación de tuberíes, arquetes y la creación de subestaciones hidráulicas pa l’intercambéu de potencia. Un proyeutu innovador que mira al futuru, pa aprovechar la enerxía llímpia, baxar emisiones de CO2 y aforrar costes.
La rede de calefacción va estendese por varies cais pa dar calefacción y agua caliente sanitaria a edificios públicos. Les obres inclúin tolo necesario pa que la infraestructura seya una realidá bien pronto, dando servicios básicos como calefacción o agua caliente a distintes instalaciones.
Centros educativos, equipamientos y servicios públicos, los dos centros de salú del cascu urbanu y les instalaciones deportivas van beneficiase d’esta actuación, financiada pol Institutu pa la Transición Xusta con fondos Next Generation dientro del Plan de Recuperación, Tresformación y Resiliencia (PRTR).
La estensión d’esta rede ta suponiendo obres en distintes cais de Mieres y dende’l Gobiernu local entiéndese que siempres generen molesties, pero recuérdase que esti proyeutu va facer que Mieres cuente con una rede de calor potente y sostenible, como yá tienen ciudaes como Estocolmu, Helsinki o Copenhague.
Imaxe: Saul Villarin
About The Author
