Mieres súmase a la Selmana Europea de la Movilidá con tres xornaes d’actividaes y el Día ensin Coche, con billetes de bus de baldre y xuegos na cai Manuel Llaneza
Saul Villarin - Un homenaxe a José Manuel Fanjul, exhibiciones y circuitos deportivos y el mercadillu de segunda mano, con distintos talleres, completen la programación.
- L’oxetivu d’esta cita ye concienciar y promocionar la movilidá sostenible potenciando l’usu del tresporte públicu, la bicicleta y los desplazamientos a pie.
MIERES, 17 DE SETIEMBRE DE 2025.– L’Ayuntamientu de Mieres, al traviés de la conceyalía de Mediu Ambiente que dirixe Teresa de la Fuente, súmase un añu más a la Selmana Europea de la Movilidá, una iniciativa que tien como oxetivu fomentar un cambéu nos hábitos de tresporte pa consiguir meyorar la calidá de vida, baxar la contaminación ambiental y acústica y aumentar la seguridá viaria, avanzando en facer que l’espaciu públicu seya accesible y seguru pa toos, incluyíos peatones y ciclistes. Trátase, poro, de concienciar a la sociedá y promocionar la movilidá sostenible potenciando l’usu del tresporte públicu, la bicicleta y los desplazamientos a pie.
Con esta premisa, y baxo’l lema d’esti añu, “Movilidá pa toles persones”, la conceyalía de Mediu Ambiente organizó un programa d’actividaes que se va desarrollar a lo llargo de tres díes —20, 21 y 22 de setiembre— y que incluye talleres, mercadillu de segunda mano, deportes y, como ye habitual, el zarru al tráficu de la cai Manuel Llaneza pa conmemorar el Día ensin Coche y permitir que la xente, sobre manera los más mozos, “tomen” la cai con actividaes y xuegos.
Amás, esti añu va facese un homenaxe a José Manuel Fanjul, el policía local que durante años llevó los cursos y talleres d’educación viaria nos centros educativos del conceyu y que finó hai unos meses.
La programación completa ye la siguiente:
Sábadu 20 de setiembre
- De 12 a 20 h. Parque Xovellanos. Mercadillu de segunda mano. Organizáu poles conceyalíes de Mediu Ambiente, Comerciu y Mocedá e Infancia.
- De 11:30 a 13 h. pa guajes de 5 a 10 años y de 17:30 a 19 h. pa mozos de 11 a 16 años. Parque Xovellanos. Vuelta al cole sostenible. Talleres de faer y reutilizar estuches y carpetes.
Domingu 21 de setiembre
- De 12 a 14 h. Parque Xovellanos. Exhibición de Patinaxe y Roller Disco col Club Mierense de Patinaxe Artísticu. Al finar la exhibición va facese la Roller Disco pa quien quiera participar.
- De 17 a 19 h. Cai Indalecio Prieto. Circuitu de Trial-Bike. Pa públicu infantil de toles edaes. Habrá bicicletes disponibles pa facer el circuitu.
Llunes 22 de setiembre – Día ensin Coche
- Tou’l día. Billete de baldre en toles llinies d’autobús d’EMUTSA.
- 17 h. Homenaxe a José Manuel Fanjul. Salón d’actos de la Casa de Cultura. Con participación d’alumnáu de distintos centros educativos del conceyu.
- De 16:30 a 20 h. Pa tolos públicos. Cai Manuel Llaneza. Toma la cai. Actividaes y xuegos: Mural Mieres ensin Coche, Taller de cuadros 2D y 3D, yincana con hinchable, 3 en raya, Torre Re-cicla, caballinos en carrera y taller de siembra vertical.
- De 17:30 a 19:30 h. Cai Manuel Llaneza. Toma la cai. Circuitu de seguridá viaria.
Tres díes d’actividaes “pa concienciar a la ciudadanía del cuidu del mediu ambiente y del cambéu d’hábitos que podemos facer, con xestos pequeños, pa construyir el Mieres que queremos nel futuru”, dixo la conceyala, que animó a toos a sumase a les cites programaes con motivu d’esta Selmana Europea de la Movilidá.
About The Author
