Severino Arias Morillo, Mari Luz Fernández Álvarez, Esther López Barceló y Manuel García Fonseca “El Polesu”, personas galardonadas en esta nueva edición del Pozu Fortuna
Saul Villarin MIERES, 3 d’ochobre de 2025.- El Conceyu de Mieres, al traviés de la Conceyalía de Memoria Democrática que dirixe Nuria Ordóñez, y la asociación Foro Pozu Fortuna informen del fallu d’esta nueva edición de los Galardones Pozu Fortuna, que van entregase’l próximu sábadu 18 d’ochobre nun actu que, como ye tradición, va convertise n’un espaciu de memoria, dignidá y xusticia. Les persones galardonaes esti añu – toes elles por unanimidá del xuráu (formáu por representantes d’asociaciones memorialistes, persones historiadores y representantes de la Universidá d’Uviéu)— son les siguientes:
Candidatura asturiana masculina: Severino Arias Morillo. Por ser testimoniu vivu d’una vida marcada pol so compromisu sindical y social, lo que lu llevó a sufrir detenciones, procesamientos xudiciales y pena de cárcel. Yá en democracia, Severino siguió implicáu en proyeutos y iniciatives venceyaes cola solidaridá contra la desigualdá.
Candidatura asturiana femenina: Mari Luz Fernández Álvarez. La so vida exemplifica lo que foi la transición y la llucha pola democracia. Foi deteníu y torturada, pero eso nun restó nin un ápiz de compromisu y llucha a una muyer que durante toa la so vida foi un referente.
Candidatura nacional: Esther López Barceló. Historiadora, guionista y escritora, Esther López Barceló ye un referente. Participó na ellaboración de la Llei de Memoria Democrática y destaca pol so compromisu en dar voz a les persones represaliaes pola dictadura franquista.
Mención Honorífica: Manuel García Fonseca “El Polesu”. Persona referente pol so compromisu cola humanidá y la xusticia social dende la política institucional pero, sobre too, dende la implicación personal de quien ye símbolu de llucha pola dignidá, la democracia y la xusticia.
Dende la Conceyalía y el xuráu destácase la relevancia de toles candidatures presentaes y la importancia d’un actu que ye ún de los más emblemáticos y importantes nel ámbitu de la memoria democrática y el reconocimientu a trayectories, proyeutos e iniciatives venceyaes a valores como la llibertá, la solidaridá, la paz y la defensa de los drechos humanos. El próximu 18 d’ochobre tenemos, poro, una cita cola memoria en Turón, nun llugar que, pola so tráxica historia – convertíu en fuesa común — se convirtió en símbolu de memoria y dignidá.
Como cada añu, dende la Conceyalía va ponese un autobús gratuitu pa esti actu que va salir dende la Plaza del Conceyu a les 11 de la mañana y del Pozu San José a les 11.15 hores.
About The Author
