L’Ayuntamientu de Mieres ufierta más de mediu centenar d’actividaes de baldre a los centros educativos
Saul Villarin
- La conceyalía d’Educación edita la Guía de Programas, Actividaes y Recursos Educativos pa informar de tolos programas y iniciatives a les que se puen sumar los centros a lo llargo del cursu escolar.
- Les actividaes propuestes promueven valores como la igualdá, la solidaridá o la tolerancia y dan la posibilidá al alumnáu de disfrutar de tolo tipu de propuestes de baldre que refuercen y diversifiquen el so aprendizaxe.
MIERES, 18 de SETIEMBRE de 2025.- Cola entamada del cursu, y tres l’éxitu llográu en años anteriores y la bona acoyida por parte de los centros educativos del conceyu, l’Ayuntamientu de Mieres vuelve a ufrir la Guía de Programas, Actividaes y Recursos Educativos 25/26. Más de 50 propuestes y recursos que tán recoyíos nesta guía y que abracen de mou tresversal distintos ámbitos (salú, deporte, ciencies, emplegu, llingua asturiana, igualdá…). Una programación que tolos centros tienen yá a la so disposición y que recuéi la información completa de toles actividaes que s’ufren.
Elaborada pola conceyalía d’Educación, col sofitu de les distintes árees municipales, esta guía conviértese nuna ferramienta importante pa la comunidá educativa del conceyu. Un documentu que, amás, cada cursu se renueva y s’actualiza, incluyendo por supuestu cites consolidaes como “Conoz Mieres de mou saludable”, Educación Vial o Visites al Ayuntamientu, por exemplu, pero tamién con otres nueves como “Cocinando Solidaridá”, entamada con AMICOS, pa la promoción del voluntariáu d’aición social ente l’alumnáu.
Les actividaes propuestes –toles de baldre—complementen la llabor de los centros na educación y la formación integral de les neñes y los neños, promoviendo valores como la solidaridá, la igualdá o’l respetu, acercando a les y los estudiantes el nuesu patrimoniu, cultura, folclor o instituciones y potenciando los hábitos saludables y la seguridá, por poner dalgunos exemplos.
La conceyala d’Educación, Belén Alonso, destaca la importancia d’esta ferramienta y agradez la implicación de los equipos docentes non solo na importante llabor que faen día tres día nes aules, sinón tamién collaborando nes propuestes plantegaes y faciendo posible “que l’alumnáu del conceyu pueda disfrutar d’esperiencies formatives enriquecedores y variaes” como les que s’incluyen nesta guía. Nesti sen, hai que destacar que tolos centros educativos del conceyu participen como mínimu en delles de les actividaes incluyíes nesta guía, na que tamién se tien un recuerdu a José Manuel Fanjul, policía recién fallecíu y encargáu durante años de la Educación Vial, que tanto collaboró con esti programa d’actividaes y que foi exemplu d’illuisión y implicación.
About The Author
