Saul Villarin Estos trabayos van suponer una inversión de cuasi 300.000 euros que va permitir una meyora integral del campu de xuegu, que va ser el primeru del conceyu con céspede sintéticu de base elástica.
MIERES, 16 de SETIEMBRE de 2025.– L’Ayuntamientu de Mieres, al traviés de la conceyalía de Deportes que dirixe César Menéndez, informa de que yá entamaron les obres d’adecuación de les instalaciones deportives del Caudal Deportivu. Un proyectu que supón una inversión de cuasi 300.000 euros y que va permitir renovar el campu de xuegu del Hermanos Antuña instalando nél un céspede de cabera xeneración, siendo esti campu’l primeru del conceyu que va cuntar con céspede sintéticu de base elástica, garantizando’l comportamientu deportivu afayadizu y cumpliendo asina cola normativa aplicable, amás de coles especificaciones de la FIFA. La sustitución de les porteríes fixes de fútbol once y los cañones de los sistemes de riego, que güei tán en superficie y van ser soterráos pa evitar riesgos, son otres de les actuaciones previstes nesti proyectu que va correxir tamién la alineación de la zona de xuegu cola pista d’atletismu que la arrodia y que tamién va ser reformada y ampliada en próximu tiempu. Amás, estes obres preveén reutilizar parte del céspede artificial retiráu del campu de fútbol pa instalalu n’otres zones d’esti equipamientu deportivu cola fin de meyorar la estética y la funcionalidá del mesmu.
Un plan integral que va permitir dar respuesta a les necesidaes del campu de fútbol municipal que sufre, pol so usu constante, un deterioru importante. Estes obres xúnense a les de rehabilitación y meyora de la tribuna oeste del estadiu, recién finaes, y nes que s’invirtió una partida de 180.000 euros. Cuasi mediu millón d’euros, poro, en obres nel Hermanos Antuña pa garantizar les meyores condiciones nesta instalación deportiva.
Estos trabayos s’enmarquen nel plan de meyora y ampliación de les instalaciones deportives del conceyu que, con más de 5 millones d’euros d’inversión, inclúi proyectos tan importantes como la rehabilitación integral del polideportivu d’Oñón, les primeres pistes de tenis de tierra batida de les Cuencas, amás de meyores nos terrenes de xuegu de campos de fútbol como’l d’Uxo —en llicitación— o Turón, yá finaes.
About The Author
